Dæmdur fyrir innbrotstilraun á Litla-Hraun

Þrítugur maður var í dag sakfelldur fyrir eignaspjöll en honum var gefið að sök að hafa klippt göt á tveimur stöðum á vírgirðinguna sem umlykur Fangelsið á Litla Hrauni. Atburðurinn átti sér stað í mars en fangaverðir sáu manninn í öryggismyndavélum og var hann handtekinn á staðnum.

Mun þetta vera í fyrsta sinn sem maður verður uppvís að því að brjótast inn í fangelsið en fjölmargir hafa reynt að fara hina leiðina, með mismiklum árangri.

Maðurinn játaði brot sitt fyrir dómi og þótti dómara hæfilegt að sekta hann um 100 þúsund krónur auk þess sem hann þarf að greiða fangelsinu tæpar 200 þúsund krónur í skaðabætur.