Óþekkt mynd af Viktoríu drottningu

Áður óséð portrett af Viktoríu Englandsdrottningu verður meðal fjögurhundruð listaverka á sérstakri minningarsýningu um drottninguna og prins Albert eiginmann hennar. Þau voru bæði miklir listunnendur.

Myndin var máluð árið 1843 þegar Viktoría var tuttugu og fjögurra ára gömul. Sítt brúnt hár hennar er slegið og hún lítur yfir öxl sér út í fjarskann.

Listamaðurinn var þýski málarinn Xavier Winterhalter og þessi mynd er sögð hafa verið í sérstöku uppáhaldi hjá Alberti.

Listsýningin verður haldin í Buckingham höll. Hún spannar tímabilið frá 1837 þegar hún var krýnd drottning til ársins 1861 þegar Albert lést.