Óttast um meintan þolanda hórmangs

Lögregla telur unga litháíska konu, sem grunur leikur á að hafi komið hingað til lands sem fórnarlamb mansals um síðustu helgi, vera í hættu. Lýst hefur verið eftir konunni, sem kom hingað undir nafninu Ieva Grisiúte, og litháískum manni, Vitalijus Gejer að nafni. Þrír litháískir karlmenn eru í gæsluvarðhaldi vegna málsins þar til í dag.

Konan kom hingað til lands með flugvél Iceland Express frá Varsjá í Póllandi síðastliðið föstudagskvöld. Á seinni hluta leiðarinnar virtist konan ærast og barði í kringum sig með ópum og óhljóðum. Áhöfn vélarinnar neyddist til að skerast í leikinn með aðstoð farþega. Á endanum þurfti að binda konuna niður í sætið og kefla hana. Af henni hafði bráð þegar lögregla handtók hana við komuna til landsins og var hún flutt rænulítil á sjúkrahús. Þar dvaldi hún aðfaranótt laugardagsins en síðan hjá lögreglunni á Suðurnesjum að eigin ósk. Hún sagðist ekki eiga í nein hús að venda og engan þekkja hér á landi. Hún gat litlar skýringar gefið á ferð sinni hingað til lands og reyndist vera með stolin ferðaskilríki.

Lögreglan varð vör við þrjá menn sem biðu eftir konunni og reyndu að ná sambandi við hana við komuna hingað. Lögregla þekkti til mannanna sem allir eru Litháar og þekktir brotamenn, sumir vegna ofbeldisbrota.

Þeir biðu hennar einnig fyrir utan Heilbrigðisstofnun Suðurnesja, þar sem hún fór í skoðun, og lögreglustöðina á Hverfisgötu, þar sem tekin var skýrsla af henni í fyrstu. Einn þeirra var í hópi manna sem réðust á nokkra óeinkennisklædda lögreglumenn í miðbæ Reykjavíkur í fyrra.

Fjórir menn voru handteknir vegna rannsóknar málsins og þrír þeirra voru úrskurðaðir í gæsluvarðhald. Þeim fjórða, íslenskum manni, var sleppt. Fjórða Litháans hefur verið leitað undanfarna daga, án árangurs. Hann er 35 ára og talinn tengjast málinu. Hugsanlegt er að hann hafi farið úr landi áður en konan kom hingað á laugardag.

Spurður hvort konan hefði átt að vera undir lögregluvernd segir Gunnar Schram, yfirlögregluþjónn á Suðurnesjum, að litið sé á þann sem verður fyrir mansali sem fórnarlamb og þolanda. „Það er reynt að umgangast fólk í þessari stöðu með það í huga. Reynt er að vista það á góðum stað, þar sem það telur sig vera þokkalega öruggt og líður vel.“

Konan var vistuð í húsnæði á vegum félagsmálayfirvalda sem engum átti að vera kunnugt um. Hún hvarf þaðan á mánudagskvöld, að því er virðist sjálfviljug. Hún hafði verið látin hafa farsíma til að kalla eftir aðstoð. Reynt hefur verið að staðsetja farsímann, en samkvæmt heimildum Fréttablaðsins hefur það ekki verið hægt þar sem slökkt er á honum. Leit að konunni stóð enn yfir þegar Fréttablaðið fór í prentun í gærkvöldi.