Segir úrskurð skapa óvissu í Miðskógum

„Deilurnar hafa verið langar, pólitískar, persónulegar, rætnar og erfiðar,“ segir Kristján Sveinbjörnsson bæjarfulltrúi í bréfi til bæjarstjórnar Álftaness um mál lóðarinnar á Miðskógum 8.

Bæjarstjórnin samþykkti nýlega byggingarleyfi fyrir einbýlishús á sjávarlóðinni á Miðskógum 8. Kristján býr þar fyrir ofan, á Miðskógum 6, og sendir bréf sitt til bæjarstjórnar sem íbúi þar. Hann gerir að umtalsefni úrskurð úrskurðarnefndar skipulags- og byggingarmála um að lóðin á Miðskógum 8 sé byggingarlóð. Kristján hefur ávallt lagst gegn byggingu húss á þessari nágrannalóð sinni.

„Úrskurðurinn er ákveðinn áfangi en um leið skapar hann óvissu og vandræði sem ekki hafa verið leyst né leiða leitað til lausna. Því er þessu máli langt í frá lokið þrátt fyrir úrskurðinn,“ skrifar Kristján bæjarstjórninni.

Í bréfi sínu rekur Kristján þá ókosti sem fylgi byggingu húss á Miðskógum 8, meðal annars slæm áhrif á Skógtjörn sem byggðin stendur við. Samþykki bæjarstjórn byggingarleyfi muni hann „skoða þann möguleika“ að fá sérstakan úrskurð frá Úrskurðarnefnd skipulags- og byggingarmála um þá ákvörðun. Eins sé hugsanlegt að leita til umboðsmanns Alþingis.

Kristján vék sæti á bæjarstjórnarfundinum en félagar hans í minnihluta Á-listans lögðu til að skoðaður yrði grundvöllur þess að kæra úrskurð úrskurðarnefndarinnar. Nefndin hefði gert mistök með því að kanna ekki ný gögn heldur byggja á dómi sem gekk í Hæstarétti. „Bæði röksemdafærsla og niðurstaða nefndarinnar vekur áleitnar spurningar um hvort verjandi er að túlka atburðarás og gjörninga eingöngu til að undirbyggja vörn um einkahagsmuni og um leið hunsa alfarið stefnu sveitarfélagsins í skipulagsmálum,“ segir í bókun fulltrúa Á-listans. Þeir nefndu þann möguleika til lausnar að eigendur Miðskóga 8 fengju nýja lóð annars staðar.

Byggingarleyfið var hins vegar samþykkt í bæjarstjórn af meirihluta fulltrúa Sjálfstæðisflokks og eins bæjarfulltrúa sem sagt hefur skilið við Á-listann. „Niðurstaða málsins kemur ekki á óvart. Þetta mál hefur kostað bæjarfélagið verulegar fjárhæðir í lögfræði- og málskostnað, fyrir utan neikvæða umræðu í bæjarfélaginu. Það er löngu orðið tímabært að finna þessu máli farsælan endi,“ bókaði meirihlutinn.

gar@frettabladid.is