Krefur Fréttablaðið um 5 milljónir

Björk Eiðsdóttir, blaðamaður á Vikunni, hefur hótað ritstjórum Fréttablaðsins málshöfðun vegna ummæla um hana sem birtust í Fréttablaðinu 6. mars síðastliðinn. Ummælin voru höfð beint eftir Ásgeiri Davíðssyni, eiganda nektardansstaðarins Goldfinger. Björk krefst fimm milljóna króna í miskabætur, ella fari hún í mál.

Rætt var við Ásgeir í Fréttablaðinu eftir að Hæstiréttur dæmdi Björk til að greiða honum hálfa milljón króna í miskabætur fyrir að bendla hann við vændisstarfsemi í grein í Vikunni. Björk krefst ómerkingar og bóta vegna eftirfarandi ummæla Ásgeirs: „Það er ekki hægt að leyfa óheiðarlegum blaðamönnum á borð við þennan, sem eru stétt sinni til skammar, að komast upp með dylgjur og óþverrahátt.“

Í máli Ásgeirs gegn Björk komst Hæstiréttur að þeirri niðurstöðu að blaðamaður bæri ábyrgð á greininni, jafnvel þótt ummælin sem þóttu ærumeiðandi væru höfð beint eftir fyrrverandi nektar-dansmær á Goldfinger.

Niðurstaða Hæstaréttar hefur vakið nokkurt umtal. Meðal annars hafa ritstjóri og blaðamenn Vikunnar lýst furðu sinni á henni auk þess sem formaður Blaðamannafélags Íslands hefur gagnrýnt hana. Í kröfu sinni segir Björk að Hæstiréttur hafi með þessu skapað fordæmi og því hljóti ritstjórar Fréttablaðsins að teljast ábyrgir fyrir ummælum Ásgeirs. - sh