Ingibjörgu þakkað fyrir fórnfúst starf í þágu íslenskra kvenna

9. mars 2009 18:51

Ingibjörg Sólrún Gísladóttir fráfarandi formaður Samfylkingarinnar.

Stjórn kvennahreyfingar Samfylkingarinnar þakkar Ingibjörgu Sólrúnu óeigingjarnt og fórnfúst starf í þágu íslenskra kvenna. Í ályktun stjórnar hreyfingarinnar segir að Ingibjörg Sólrún hafi lagt gríðarlega mikið af mörkum til íslenskrar kvennabaráttu.

,,Hún var afar farsæll Borgarstjóri í Reykjavík í 10 ár, þar sem mikil áhersla var lögð á réttindi kvenna og Grettistaki var lyft í að breyta stjórnsýslunni í takt við nýja tíma. Árangur náðist í að minnka launamun kynjanna og í hennar borgarstjóratíð varð mikil umbreyting í menntunar – og vistunarmálum ungra barna til hins betra. Leikskólabylting átti sér stað og skólar voru einsetnir,“ segir í ályktuninni.

Sem formaður Samfylkingarinnar hafi Ingibjörg Sólrún lagt mikla áherslu á að byggja flokkinn upp og gera hann að þeim stóra og sterka jafnaðarmannaflokki sem Samfylkingin er í dag, að mati stjórnarinnar. ,,Hún braut blað þegar hún leiddi Jóhönnu Sigurðardóttur til embættis forsætisráðherra, fyrsta íslenskra kvenna.“

Stjórn kvennahreyfingarinnar segir að Ingibjörg Sólrún hafi kvatt íslenska pólitík á alþjóðlegum baráttudegi kvenna 8. mars. ,,Konur í Samfylkingunni þakka Ingibjörgu Sólrúnu framlag hennar til íslenskrar stjórnmálaumræðu til þessa dags og óska henni alls hins besta í framtíðinni.“

Mest lesið

Fleiri fréttir