Gerir betur en Björk, Bubbi og Egill Ólafs

„Þetta er náttúrulega eins og maðurinn segir, allt eftir því hvernig á það er litið. En Maggi [Magnús Einarsson, útvarps- og tónlistarmaður] var eitthvað að skoða þetta, lét mig hafa listann og þá kom á daginn að ég hef komið við sögu á 19 af þessum plötum,“ segir Tómas Tómasson tónlistarmaður hógvær að vanda.

Á tónlist.is hefur að undanförnu staðið yfir val á 100 bestu plötum Íslandssögunnar og 25. apríl síðastliðinn sló Mogginn því upp að Egill Ólafsson tengist ellefu þeirra og geri betur en Björk, Bubbi og Sigur Rós. Egill var af því tilefni í viðtali við Mogga og að vonum kátur með að teljast öflugastur íslenskra dægurtónlistarmanna. „Ég er bara alveg í skýjunum yfir þessu,“ sagði Egill.

En þarna er vaðið yfir manninn sem skýtur öllum ofangreindum ref fyrir rass. Tómas segir aðspurður það orðum aukið að vaðið sé yfir sig af sínum gamla félaga í Stuðmönnum og Þursaflokknum. „Nei, nei, þetta var tilkynning frá tónlist.is. Egill er saklaust fórnarlamb í þessu – blásaklaus forsöngvari.“ Hann segist ekki ætla að bera ábyrgð á því hvort hann sé konungur hundrað laga listans, hefur ekki kannað það sérstaklega og bendir á að félagi sinn, Ásgeir Óskarsson, hafi verið afskaplega vinsæll í hljóðverum. „Þessar plötur eru mikið til frá sama tímabili. Golden Days hjá mér í upptökuverinu – án þess að ég sé að segjast hættur.“

Plöturnar sem Tómas hefur komið að ýmist sem hljóðfæraleikari, upptökumaður eða upptökustjóri eru eftirfarandi: Fjórar plötur Þursaflokksins, þrjár með Stuðmönnum, Í góðri trú með Megasi, Rokk í Reykjavík, Einu sinni var – vísnaplatan, Kona/Dögun/Fingraför með Bubba, Ímynd og Breyttir tímar með Egó, Bein leið með KK, Gling Gló Bjarkar, 1. plata Spilverksins og Álfar Magnúsar Þórs. - jbg