Alan Wiley úthlutað Manchester United leik

Dómarinn Alan Wiley mun dæma leik Hull og Manchester United í ensku úrvalsdeildinni sem fer fram 27. desember næstkomandi, Wiley komst heldur betur í fréttirnar eftir síðasta United-leik sem hann dæmdi en hann fór fram 3. október síðastliðinn.

Sir Alex Ferguson, stjóri Manchester United, fékk tveggja leikja bann fyrir að gagnrýna líkamlegt form Alan Wiley eftir 2-2 jafntefli Manchester United og Sunderland á Old Trafford 3. október.

Ferguson baðst seinna afsökunar á ummælum sínum en eftir leikinn kom í ljós að það höfðu bara fjórir leikmenn liðsins hlaupið meira en Wiley í leiknum. Wiley hljóp alls rúma ellefu kílómetra þær 95 mínútur sem leikurinn stóð yfir.

Wiley er 49 ára og sjö mánaða og annar elsti dómari deildarinnar. Sá elsti er Peter Walton.