Byrjað að yfirheyra embættismenn

 Rannsóknarnefnd um bankahrunið hefur hafið skýrslutökur af lykilmönnum úr stjórnsýslunni til að afla sér upplýsinga um orsakir og aðdraganda hrunsins. Verkið er seinunnið, segir formaðurinn Páll Hreinsson.

„Þetta tekur mjög langan tíma,“ segir hann. „Það fer alveg hálfur dagur í hverja skýrslutöku.“ Skýrslur eru teknar frammi fyrir að lágmarki tveimur nefndarmönnum af þremur og ganga ekki ósvipað fyrir sig og skýrslutökur fyrir dómstólum, segir Páll. Ekki sé búið að ræða við mjög marga enn sem komið er. „Þetta á örugglega eftir að standa fram á haust,“ segir hann.

Páll segir nefndarmenn þurfa að vinna betur úr upplýsingum úr bankakerfinu áður en að því kemur að bankafólk verði kallað fyrir nefndina.

Nefndin stefnir á að fá hóp erlendra sérfræðinga til starfa með sér og að þeir muni að mestu starfa við það í sumar. Þeir munu verða í fullu starfi um hríð og vinna hérlendis. Páll vill ekki segja að svo stöddu hversu margir erlendu sérfræðingarnir verða eða nefna nein nöfn, en segir þó að þar verði á ferðinni „þekktir menn hver á sínu sviði“.

- sh