Brutust óvart inn í klukkubúð

„Ég ætlaði að fara að kaupa mér kók og samloku," segir hinn rúmlega tvítugi Pálmi Þorsteinsson sem varð fyrir sérkennilegri uppákomu í nótt þegar hann gekk inn í 10-11 í Sporhömrum til þess eins að finna út að búðin var mannlaus. Í ljós kom að verslunin var lokuð og hafði verið síðan fyrsta mars. Með Pálma í för var bróðir hans en klukkan var að ganga fjögur um nóttina þegar þeir gengu inn.

„Það var allt kveikt eins og vanalega, vörur í hillunni og svona, í fyrstu virtist ekkert undarlegt við þetta," segir Pálmi en sjálfur hefur hann verið atvinnulaus síðan í október en þá starfaði hann fyrir Eimskip. Að sögn Pálma kviknaði svo skyndilega á öryggiskerfinu þegar þeir voru komnir langleiðina inn í verslunina, þá hafi Pálma verið litið á afgreiðslukassana en sá engan þar að störfum. Það var þá sem hann áttaði sig á því að búðin var í raun mannlaus.

„Ég stoppaði, ég vildi ekki fara lengra inn í búðina svo myndavélin myndi hafa mig í augnsýn allan tímann," segir Pámi sem þá fór að óttast að hann og bróðir hans gætu lent í vandræðum vegna verslunarferðarinnar, jafnvel verið sakaðir um innbrot.

Stuttu síðar heyrði hann bíl bremsa með látum fyrir utan búðina. Þá var öryggisvörður frá Securitas kominn á vettvang til þess að handsama meintan þjóf. Pálmi segir að öryggisvörðurinn hafi litið á þá bræður og gripið í talstöðina sína. Þeir reyndu þá að segja honum að þeir höfðu ekkert illt í huga, þá langaði bara í samloku og kók, og þá helst borga fyrir vörurnar.

„Hann var vantrúaður til að byrja með, síðan var hann alltaf að tala í talstöðina til skiptis," segir Pálmi sem þurfti að hafa sig allan við til þess að sannfæra öryggisvörðinn um að þeir væru engir innbrotsþjófar. Pálmi segist þó hafa haft fullan skilning á tortryggni varðarins, það er ekki á hverjum degi sem maður gengur inn í mannlausar búðir.

„Að lokum komst hann að þeirri niðurstöðu að einhver hefði gleymt að læsa hurðinni," segir Pálmi sem þótti atburðir síðastliðinnar nætur heldur undarlegir. Honum hafi þó þótt málið frekar spaugilegt allt saman og bendir á að það sé svo sannarlega alltaf opið hjá 10-11.

Forsvarsmenn 10-11 segja að starfsmaður hafi gleymt að læsa hurðinni. Búðin er hinsvegar starfandi á daginn en ekki með næturþjónustu eins og var fyrir fyrsta mars.