Segja dóm Hæstaréttar samþykkja vændissölu þriðja aðila

Femínistafélag Íslands fordæmir nýfallin dóm Hæstaréttar í máli Bjarkar Eiðsdóttur blaðamanns á Vikunni og Ásgeirs Þór Davíðssonar gjarnan kenndan við Goldfinger. Hæstiréttur dæmdi Björk til að greiða Ásgeiri 500.000 kr fyrir að birta ummæli fyrrverandi nektardansmeyjar um vændi á Goldfinger.

Þetta kemur fram í yfirlýsingu frá Femínistafélagi Íslands. Þar segir ennfremur að dómurinn í heild sinni brjóti gegn leikreglum lýðræðis og mannréttinda. Hann endurspegli úrelt gildismat sem byggi á valdníðslu valdhafa og virðingu fyrir peningum á kostnað kvenna.

„Dómurinn felur í sér samþykkt á vændissölu þriðja aðila en bannar þolendum vændis að tjá sig. Jafnfram brýtur dómurinn frelsi fjölmiðla á bak aftur. Valdhafar eiga orðið og tjáningafrelsi þegna landsins er fótum troðið," segir í yfirlýsingunni.

„Femínistafélagið harmar að á endurreisnartímum íslensks samfélags skuli háttvirt samfélagsstofnun, Hæstiréttur, komast upp með mannréttindabrot. Femínistafélagið krefst uppstokkunar í Hæstarétti líkt og öðrum stofnunum samfélagsins og skorar á aðila málsins að áfrýja málinu til Evrópudómstóls."