Ari átti ENRON

Ari Matthíasson sem mun skipa fjórða sætið í öðru Reykjavíkurkjördæmanna fyrir Vinstri græna hefur sent frá sér yfirlýsingu er varðar fjárhagsleg tengsla hans við atvinnulífið. Þar kemur meðal annars fram að Ari hafi aldrei áður tekið þátt í stjórnmálum og hafi því ekki auðnast því að slíta á tengsl sín við atvinnulífið með því að losa um eign sína í hinu skráða félagi KR-SPORT þar sem hann hafði áður verið stjórnarmaður.

„Líklegt má þó telja að verðmæti í því hlutafélagi sé fyrst og fremst tilfinningalegs eðlis og að lítill markaður sé fyrir bréfin þó ég minnist þess að auglýst var fyrir einhverjum misserum eftir þeim sem viljugir væru til þess að selja," segir Ari í yfirlýsingunni.

Einnig á hann einkahlutafélagið Nýja Ísland ehf sem áður hét ENRON ehf. „Meðan félagið hét ENRON var starfsemi í því lítil sem engin enda það stofnað utan um liststarfsemi mína sem var í lágmarki. Síðastliðið haust breytti ég nafni ENRON í Nýja Ísland þegar ég ákvað að ráðast í uppsetningu á Við borgum ekki! Við borgum ekki! eftir Dario Fo sem verður frumsýnt í maí n.k. í Borgarleikhúsinu í samvinnu við L.R," segir Ari.

„Nafninu var breytt vegna þess að mér fannst eitthvað rétt við það að fyrirtæki sem áður hafi heitið Enron héti í dag Nýja Ísland og setti upp gamanleiki."

Hann segir einnig að forvalsbarátta sín hafi verið háð með þeim hætti að hann ásamt konu sinni hafi hringt í vini og vandamenn þar sem beðið var um stuðning.

„Aðrir komu ekki að þeirri baráttu, hvorki beint né óbeint og enginn veitti fjárhagslegan stuðning. Kostnaður gæti slagað hátt í 10.000 kr. , en þar vegur hæst símakostnaður og eitt hóp-SMS sem stuðningsmönnum var sent á kjördag."