Mun lækka launin og selja glæsibifreið

Lúðvík Lúðvíksson frambjóðandi til formanns VR segir að sitt fyrsta verk nái hann kjöri á miðvikudaginn verði að lækka laun formannsins ásamt því að selja glæsibifreið sem formaðurinn ekur um á.

Þetta kemur fram í tilkynningu frá Lúðvíki. Hann segist munu notast við eigin bíl í sínum störfum fyrir VR og segist reyndar hafa stungið upp á því á framboðsfundi um daginn að réttara væri að núverandi formaður fengi strætókort í stað bifreiðar sem sé í boði félagsmanna VR.

Hann segir núverandi formann aðallega hafa verið í ferðum á milli skrifstofu VR og Kaupþings banka í stað þess að vera í störfum fyrir hinn almenna félagsmann VR.

„Glæsibifreiðin fer beint í sölu ef ég næ kjöri, það er á hreinu. Ég mun fara ofan í bækur VR með hæfustu aðilum og leggja fjárfestingastefnu VR fram til okkar félagsmanna. Við í VR eins og aðrir þurfum að læra af mistökum stjórnenda sem fóru mikinn með okkar eigur í VR," segir Lúðvík.

Hann segir einnig að vonandi fyrir formanninn mun ekkert athugavert koma fram í bókum félagsins, en glæsibifreiðin verði seld og launin lækkuð við fyrsta tækifæri.

„Nái núverandi formaður kosningu vil ég spyrja hvort hann ætli að sitja á glæsibifreiðinni og hvort hann ætli að halda sínum 10 földu launum á við hina lægstlaunuðustu í VR."