Gríðarlegur þrýstingur á Jóhönnu

Gríðarlegur þrýstingur er á Jóhönnu Sigurðardóttur, forsætisráðherra, að bjóða sig fram til formanns Samfylkingarinnar á næsta landsfundi. Hvorki Dagur B. Eggertsson né Árni Páll Árnason útiloka formannsframboð standi Jóhanna fast við fyrri ákvörðun um að bjóða sig ekki fram.

Ingibjörg Sólrún Gísladóttir, formaður Samfylkingarinnar, tilkynnti í gær að hún ætlar ekki að bjóða sig fram til formanns á landsfundi flokksins í lok mánaðarins. Þá hyggst hún draga sig í hlé frá stjórnmálum vegna veikinda.

Jóhann Sigurðardóttir, forsætisráðherra, hefur lýst því yfir að hún sækist ekki eftir formannsembættinu en margir samfylkingarmenn vilja nú að hún skipti um skoðun.

,,Ég held að það sé óhætt að fullyrða að það sé einhugur um það í þingflokknum að Jóhanna gefi kost á sér til að verða formaður Samfylkingarinnar, segir Björgvin G. Sigurðsson þingmaður.

,,Í mínu kjördæmi þar sem ég haft samband við nú í morgun er mikill vilji fyrir því að ég óski eftir því við Jóhönnu að hún taki við formennsku í flokknum og leiði okkur í gegnum þessar kosningar," segir Kristján Möller samgönguráðherra.

,,Það má lýsa því þannig að í landsbyggðinni og hér í Reykjavík sé bylgja sem bókstaflega fellur að dyrum stjórnarráðsins og vill að Jóhanna taki þetta að sér," segir Össur Skarphéðinsson utanríkis- og iðnaðarráðherra.

Dagur B. Eggertsson, oddviti Samfylkingarinnar í Reykjavík og Árni Páll Árnason þingmaður hafa boðið sig fram til varaformanns. Þeir hafa einnig verið nefndir sem mögulegir arftakar Ingibjargar.

,,Ég veit ekkert um neitt svoleiðis. Við erum ekkert búin að hugsa neitt skapaðan hlut um það," segir Árni Páll spurður hvort hann ætli að bjóða sig fram sem formaður geri Jóhanna það ekki. Árni útilokar ekki neitt.

Dagur B. Eggertsson segir eðlilegast að Jóhanna taki við formannsembættinu. ,,En það er auðvitað landsfundar að ákveða það."

,,Ég held að það sé líka ástæðulaust að hafa í einhverjum heitstrengingum í neinar áttir. Þetta verður bara fá sinn tíma," segir Dagur spurður hvort hann útiloki framboð.