Á tíu þúsund í Decode

Fyrrum efnhagsráðgjafi forsætisráðuneytisins, Tryggvi Þór Herbertsson, hefur birt yfirlit yfir efnahagstengsl sín við atvinnulífið. Yfirlitið birtir hann á bloggsíðu sinni. Þar segir hann að hans einu tengsl við atvinnulífið séu eign á 116 hlutum í Decode, sem nú eru tíu þúsund króna virði. Hlutina á hann með eiginkonu sinni.

Tryggi Þór býður sig nú fram fyrir Sjálfstæðisflokkinn í Norðausturkjördæmi.

Áður en Tryggvi var sérlegur efnahagsráðgjafi þáverandi forsætisráðherra, Geirs H. Haarde, starfaði hann sem forstjóri Askar Capital.

Á bloggi sínu segir Tryggvi að þar hafi hann ekki verið á ofurlaunum, heldur hafi honum verið boðið að öðlast rétt á að kaupa 300 milljón hluti á sama gengi og stofnhlutafar nutu - genginu einum - á þrem árum. Sjálfur þurfti Tryggvi að reiða fram hálfa milljón til þess að stofna félag um hlutina. Þar með hafi árnngur fyrirtæksins verð beintengt hans eigin hagsmunum.

Hann segir að hagnaður hafi aldrei verið leystur út, heldur hafi hann selt hlut sinn í félaginu fyrir jafn mikið og upphaflega var lagt upp með, það er að segja fimm hundruð þúsund krónur. Það gerði Tryggvi eftir að hann tók við starfi efnhagsráðgjafa forsætisráðaherra.