Ríkið þarf að greiða bætur vegna hlerunar

Héraðsdómu Reykjavíkur dæmdi íslenska ríkið til þess að greiða Guðmundi Inga Þóroddsyni 250 þúsund krónur í miskabætur vegna ólögmætrar hlerunar.

Guðmundur fór í mál við ríkið eftir að hann fann hlerunarbúnað undir bifreið sinni í nóvember 2007.

Lögreglan hleraði þá Guðmund og hafði hann grunaðan vegna tengsla við UPS-málið svokallaða þar sem fíkniefnum var smyglað með póstþjónustunni. Annþór Kristján Karlsson var síðar dæmdur fyrir brotið auk tveggja bræðra sem komu að málinu. Guðmundur var aldrei ákærður í tengslum við innflutningin.

Lögreglan taldi tengsl á milli Guðmundar og Annþórs í ljósi þess að finna mátti símanúmer Guðmunds í síma Annþórs. Þá þótti þeim tíðar ferðir Guðmundar til Spánar dularfullar.

Það skipti þó engu því lögreglan fékk ekki leyfi dómara til þess að hlera bílinn, var hlerunin því ólögmæt.

Í ljósi þess að hlerunarbúnaðurinn var aðeins í þrjá daga undir bílnum greiðir ríkið Guðmundi 250 þúsund krónur og málskostnaður er látinn niður falla.