Birgir: Vinstri grænir tala meira en sjálfstæðismenn

Birgir Ármannsson, þingmaður Sjálfstæðisflokksins, segir að þingmenn Vinstri grænna hafi talað meira að meðaltali en þingmenn Sjálfstæðisflokksins á yfirstandandi kjörtímabili.

Birgir hefur sent fjölmiðlum yfirlýsingu vegna orða Sivjar Friðleifsdóttur, þingflokksformanns Framsóknarflokksins á Alþingi í dag að þingmenn Sjálfstæðisflokksins væru að verða eins og Vinstri grænir.

Vegna ásakana hennar um málþóf í þinginu telur Birgir rétt að taka eftirfarandi fram:

,,Á þessu löggjafarþingi, frá 1. október til loka síðustu viku, höfðu þingmenn Vinstri grænna talað að meðaltali í 413 mínútur á mann en þingmenn Sjálfstæðisflokksins í 135 mínútur að meðaltali á mann. Þingmenn Vinstri grænna höfðu þannig talað í tæpar 7 klukkustundir á meðan þingmenn Sjálfstæðisflokksins töluðu í rúmar 2 klukkustundir. Það er því nokkuð langt í land að sjálfstæðismenn á þingi komist með tærnar þar sem Vinstri grænir hafa hælana í sambandi við það að lengja störf þingsins."