Gera ráð fyrir 400 þúsund bólusetningum vegna flensu á Íslandi

Inflúensa A eða svokölluð svínaflensa hefur verið staðfest alls staðar á landinu nema í Vestmannaeyjum. Alls hafa 173 tilfelli af inflúensunni verið staðfest með sýnatöku hérlendis. Tilfellunum hefur farið fækkandi og er skýringin mögulega sú að sýnatökum er að fækka.

Þetta kom fram á símafundi almannavarnadeildar og sóttvarnalæknis með sóttvarnalæknum og lögreglustjórum um land allt í morgun. Þar var farið yfir stöðuna í inflúensumálinu, einkum um framkvæmd bólusetningar næstu mánuði. Þetta er annar símafundurinn af þessu tagi og ætlunin er að þeir verði reglulegur viðburður á hverjum föstudagsmorgni svo menn hafi sameiginlegan og skilvirkan vettvang til að samræma aðgerðir og bera saman bækur sínar.

Talið er ljóst að gríðarlegt álag verði á heilsugæslu og heilbrigðiskerfi landsins vegna bólusetningarinnar. Gert sé ráð fyrir allt að 400 þúsund bólusetningum á landinu til áramóta, vegna inflúensu og „venjulegrar og árlegrar inflúensu". Bóluefni vegna venjulegrar inflúensu er væntanlegt til landsins í haust, eins og venjulega á þessum árstíma. Hugsanlegt er að þeirri bólusetningu verði frestað í fáeinar vikur til leggja ekki meira á heilbrigðiskerfið á stuttum tíma en fyrirsjáanlegt er vegna inflúensunnar A.