Landvernd: Orkuveitan villir um fyrir fólki

Bergur Sigurðsson, framkvæmdastjóri Landverndar segir að tilkynning Orkuveitunnar um að til standi að hefja hreinsun hveralyktar úr gufunni, sem kemur frá virkjun fyrirtækisins á Hellisheiði, sé til þess fallin að villa um fyrir fólki. Hann segir að látið sé hjá líða að greina frá því að losun brennisteinsvetnis er hvað mest þegar holur eru í blæstri.

„Blástursferlið stendur yfir í nokkra mánuði áður en hægt er að taka holurnar í notkun. Ekki er hægt að hreinsa brennisteinsvetni úr holum sem eru í blæstri. Frekari boranir og holublástur á Hellisheiðinni samhliða nýjum virkjunum munu því auka mengunarálag af völdum brennisteinsvetnis," segir Bergur.

„Nú hefur mengun frá starfandi virjunum náð heilsuverndarviðmiði Alþjóða heilbrigðismálastofnunarinnar og eins og fram kemur í tilkynningu Umhverfisstofnunar eru langtímaáhrif brennisteinsvetnis í lágum styrk á heilsu fólks ekki vel rannsökuð. Æskilegt væri að Orkuveita Reykjavíkur setji upp og sannreyni hreinsivirki á starfandi virkjanir áður en ráðist verður í frekari boranir með tilheyrandi holublæstri og aukinni brennisteinsvetnismengun," segir hann einnig.

Bergur staðhæfir einnig að engin reynsla sé komin á „þær tæknilegu lausnir sem lagðar eru til af hálfu OR, þ.e. niðurdælingu á brennisteinsvetninu. Því er alsendis óljóst um hvort lausnin sé raunhæf. Hefðbundnar og þekktar lausnir til hreinaunar á brennisteinsvetni fela jafnan í sér efnafræðilega útfellingu efnisins. "