Vill frekar sértækar aðgerðir fyrir skuldara en almennar

Sigríður Ingibjörg Ingadóttir, varaformaður félags- og tryggingamálanefndar, segir ekki von á frumvarpi úr nefndinni vegna skuldavanda heimilanna. Nefndin fundaði um málið í morgun og fékk til sín gestafjöld, þar á meðal fulltrúa Hagsmunasamtaka heimilanna, Íbúðalánasjóðs og stóru bankanna þriggja.

Hún segir ýmislegt hafa verið rætt á fundinum, til dæmis starf nefndar á vegum félags- og tryggingamálaráðuneytisins um bílalán í erlendri mynt, hvernig hægt sé að koma böndum á háan innheimtukostnað og almennar aðgerðir til niðurfellingar skulda, sem hún er þó ósammála.

„Ég held að það sé óhætt að segja að ég hef ekki verið talskona þess að beita almennum aðgerðum því ég tel að við gætum ekki staðið undir því. Auk þess er ekki víst að þær séu neitt réttlátari heldur en þær sértæku," segir Sigríður og bendir á vandann sem skapast við niðurfellingu skulda þegar þeir varkárustu fái í raun minnsta fyrirgreiðslu.

Lilja Mósesdóttir, formaður nefndarinnar og þingmaður Vinstri grænna, hefur hins vegar talað fyrir mikilvægi þess að ræða mjög almenna aðgerð, sem gagnast sem flestum skuldurum.

Sigríður segir vaxandi vanskil og stækkandi hlutfall tekna sem fer í afborganir áhyggjuefni og segir jafnvel hætt við að þó fólk geti borgað, þá missi það greiðsluviljann. Hún segir mikilvægt að fylgjast með aðstæðum og efla sértæk úrræði á borð við þau sem standa til boða.

„Mikilvægast er þó að koma hjólum atvinnulífsins í gang og ná böndum yfir íslensku krónuna. Þar liggja hagsmunirnir og þannig er hægt að hafa áhrif á greiðslugetu heimilanna og greiðslubyrði lánanna," segir Sigríður að lokum.