Formannsefni kynna áherslur sínar í dag

Landsfundi Framsóknarflokksins verður framhaldið í Vodafonehöllinni í dag, en landsfundurinn samþykkti með miklum meirihluta atkvæða í gær að Ísland gangi til aðildarviðræðna að Evrópusambandinu.

Í dag ber hæst kappræða milli þeirra manna sem hafa boðið sig fram til embættis formanns í flokknum. Kappræðurnar hefjast klukkan hálf eitt og standa í níutíu mínútur undir stjórn Guðmundar Steingrímssonar, sem er nýgenginn til liðs við flokkinn eftir að hann gekk úr Samfylkingunni.

Stefnubreyting Framsóknarflokksins í evrópumálum er söguleg. Hún var samþykkt með ýmsum skilyrðum, eins og að forræði Íslendinga yfir auðlindum þjóðarinnar verði ávallt tryggt og að Íslendingar geti sagt sig úr sambandinu kjósi þeir svo.

Kosið verður í embætti flokksins á lokadegi landsfundarins á morgun. Í framboði til varaformanns eru Siv Friðleifsdóttir og Birkir Jón Jónsson alþingismenn. Sæunn Stefánsdóttir núverandi ritari flokksins sækist áfram eftir kjöri en um það embætti keppa einnig Eygló Harðardóttir alþingismaður og Gunnar Bragi Sveinsson frá Sauðárkróki.