Víðast eru hagfræðingar í forsvari

Af 38 seðlabankastjórum í 36 löndum sem Íslendingar gætu miðað sig við eru tveir sem ekki eru með framhaldsmenntun á sviði hagfræði. Einföld samantekt af vefjum bankanna leiðir þetta í ljós.

Rúmur helmingur, eða 20 bankastjóranna, er með doktorspróf í hagfræði.

Í frumvarpi til nýrra laga um Seðlabanka Íslands sem nú er í meðförum þingsins er gerð krafa um hagfræðimenntun Seðlabankastjóra hér. Í fyrstu drögum var krafist meistaraprófs, en komið hefur fram gagnrýni á að það myndi útiloka hagfæðinga menntaða í Bandaríkjunum.

Seðlabankastjórarnir tveir sem skera sig úr hópnum eru Christian Noyer, í Frakklandi, og Yves Mersch, í Lúxemborg. Báðir eru þeir með lögfræðimenntun og Noyer einnig með embættismannapróf úr École nationale d'administration (ENA), sem felur í sér nokkurt hagfræðinám.

Seðlabankar Frakklands og Lúxemborgar heyra undir Seðlabanka Evrópu og eru ekki með sjálfstæða peningastefnu. Jean-Claude Trichet, MA í hagfræði, er bankastjóri Seðlabanka Evrópu.

Ingimundur Friðriksson er með meistaragráðu í þjóðhagfræði, Eirikur Guðnason með framhaldsmenntun í viðskiptafræði og Davíð Oddsson er lögfræðingur.

- óká