Boða kvöldfundi en mæta ekki sjálfir

Tuttugu og fjórir þingmenn létu að sér kveða í heitum umræðum við upphaf þingfundar þar sem stjórnarandstaðan mótmælti því að halda ætti kvöldfund í þinginu til að ræða stjórnarfrumvarp um ríkis­ábyrgð.

Sigmundur Davíð Gunnlaugsson, formaður Framsóknarflokksins, segir ríkisstjórnina vilja helst að umræður um Icesave „fari fram hér á kvöldin eða næturnar svoleiðis að stjórnarliðar þurfi ekki að hlusta á þær".

Unnur Brá Konráðsdóttir, Sjálfstæðisflokki, og fleiri átöldu stjórnarþingmenn fyrir að mæta ekki og hlusta á umræður á kvöldfundum, sem þeir styðja sjálfir að boðað sé til.

„Ef þetta eru vinnubrögðin, að fara með málin hér í gegn á kvöldin og um nætur, munum við að sjálfsögðu taka á því með þeim hætti sem þarf," sagði Gunnar Bragi Sveinsson, þingflokksformaður Framsóknar. „Um þetta verður ekki friður. Það er ríkisstjórnin, sem er að gefa upp þennan bolta og við munum grípa á lofti og senda til baka."

Stjórnarþingmenn sögðu stjórnarandstöðuna efna til málþófs um Icesave til að tefja þingstörf og hindra að önnur mál og brýnni kæmust á dagskrá, til dæmis skattamál og afgreiðsla fjárlaga.

Illugi Gunnarsson sagði að þvert á móti vildi þingflokkur Sjálfstæðisflokksins hliðra til fyrir brýnum málum, sem „snúa að fyrirtækjunum og heimilunum".

Framkvæmdastjóri Alþjóðagjaldeyrissjóðsins og fleiri lánveitendur íslenska ríkisins hafi sagt að afgreiðsla Icesave sé ekki skilyrði fyrir lánveitingum og samstarfi við Ísland. Þá sé ekkert því til fyrirstöðu að Alþingi taki Icesave af dagskrá og snúi sér að brýnni málum, eins og ríkisfjármálum og skattafrumvörpum stjórnarinnar.

Ólína Þorvarðardóttir, þingmaður Samfylkingarinnar, sagði mótsögn í málflutningi stjórnarandstæðinga. Annars vegar ættu stjórnarliðar að sitja næturfundi, af því að málið væri svo brýnt. „Í hinu orðinu tala þeir um að það sé annað brýnna að ræða og þessu megi fresta fram í febrúar." Eftir sex mánaða umræður sagðist Ólína ekki sjá ástæðu „til að halda vöku minni" en sjálfsagt sé að gefa svigrúm þeim sem vilja enn þá ræða um Icesave fram á nætur.

peturg@frettabladid.is