Sótt um á allra næstu dögum

Jóhanna Sigurðardóttir forsætisráðherra segir ákvörðun Alþingis um að sækja um aðild að Evrópusambandinu vera sögulega. Atkvæðagreiðslan í þinginu í dag sé líklega ein sú ánægjulegasta sem hún hafi tekið þátt í vegna þess að hún hafi mikla þýðingu fyrir Ísland.

„Við munum nú leggja inn formlega umsókn hjá formennskuríkinu í ráðherraráði ESB á næstu dögum og hefja skipulegan undirbúning að aðildarviðræðum.

Allt kapp verður lagt á að allir stjórnmálaflokkar og hagsmunaaðilar á Íslandi eigi hlutdeild í viðræðuferlinu og almenningur fái sem bestar upplýsingar um kosti og galla aðildar til þess að geta tekið afstöðu í þjóðaratkvæðagreiðslu um væntanlegan aðildarsamning," segir Jóhanna í yfirlýsingu sem birt var í dag.

Jóhanna segir að Ísland og ríkin 27 í Evrópusambandinu, sem gengið verði til samninga við, deili sameiginlegri lýðræðis- og menningarhefð, og Ísland hafi um árabil verið virkur þátttakandi í Evrópusamstarfi í víðasta skilningi.

„Sem norrænt velferðarríki og aðili að EES og Schengen er Ísland vel í stakk búið til þess að ræða skilyrði og forsendur fyrir fullri aðild að Evrópusambandinu við aðildarríkin og stofnanir ESB," segir Jóhanna.