SAS-farþegar til Osló

Farþegar sem voru með flugvél SAS sem þurfti að lenda í Bergen vegna bilunar í hreyfli, eru komnir til Osló með öðru flugi, samkvæmt Bryndísi Torfadóttur, framkvæmdastjóra SAS hér á landi.

Hún segir að aðvörunarljós hafi kviknað og gefið í skyn að bilun væri í hreyfli. Því var ákveðið í öryggisskyni að fljúga með vélina til Bergen en hún átti að fljúga til Osló.

Vélin lenti á Flesland-flugvellinum í Bergen. Samkvæmt norskum fjölmiðlum var gríðarlegur viðbúnaður vegna lendingarinnar sem gekk vel. 102 farþegar og starfsfólk var í vélinni.

Vélin flaug frá Keflavík og lagði af stað í hádeginu. Meirihluti farþega var frá Noregi að sögn Bryndísar.

Ekki er ljóst hver bilunin var. Farþegum var flogið með annarri flugvél til Oslóar nú fyrir stundu að sögn Bryndísar.

Ranghermt var í frétt fyrr í dag að SAS væri nýbyrjað að fljúga áætlunarflug frá Íslandi. Hið sanna er að félagið hefur haldið uppi áætlunarflugi hér í þrjú ár sex sinnum í viku.