Fjölskylduhjálp: „Það er allt tómt, allar frystikistur, allir skápar“

Fjölskylduhjálp Íslands er orðinn uppiskroppa með matvæli en líknarfélagið biðlar til þjóðarinnar allrar að aðstoða félagið svo það geti aðstoðað þá sem minna mega sín. Góðgerðarfélagið hefur hingað til aðstoðað 49 þúsund einstaklinga á ári - allt stefnir í að það met verði slegið í ár.

„Það er allt tómt, allar frystikistur, allir skápar" segir Ásgerður Jóna en á síðasta miðvikudag komu 430 fjölskyldur til Fjölskylduhjálpar en það er met hjá góðgerðasamtökunum.

Hún segir fjölskylduhjálp vera það líknarfélag sem hafi minnst til ráðstöfunar yfir árið eða um 11 milljónir króna. Ásgerður segir féð hafa verið nægt í bland við rausnarlega aðstoð fyrirtækja á árum áður og það skilaði sér til 49 þúsund einstaklinga yfir árið. En nú séu ótrúlegir tímar; 16 þúsund manns eru atvinnulausir og enn þarf að aðstoða þann hóp, „sem hefur það bágborið," eins og Ásgerður orðar það.

„Við eigum nóg af flíkum en það vantar alltaf jólakjóla," segir Ásgerður Jóna og bendir á að fólk megi vera fyrr á ferðinni vilji það gefa kjóla.

„Þetta fólk ber harm sinn í hljóði," segir Ásgerður Jóna.

Símar Fjölskylduhjálparinnar eru 551 3360 og 892 9603. Einnig er tekið á móti framlögum á reikningi Fjölskylduhjálpar Íslands bnr. 101-26-66090, kt. 660903-2590.