Framsóknarmenn takast á um ESB

Flokksþing Framsóknarflokksins hófst í morgun. Í dag verður meðal annars tekist á um Evrópumálin en fyrir liggur tillaga um flokkurinn styðji aðildarviðræður.

Fyrirfram er búist við hörðum átökum á flokksþingi framsóknamanna sem haldið verður um helgina. Athygli manna beinist meðal annars að ályktun þessa efnis að Íslands hefji aðildarviðræður að Evrópusambandinu.

Fimm bjóða sig fram til formanns en baráttann stendur fyrst og fremst milli þriggja frambjóðenda.

Höskuldur Þórhallsson, er andvígur aðild, en sagðist í samtali við fréttastofu vera reiðubúinn til aðildarviðræðna með þeim skilyrðum að forræði Íslendinga yfir auðlindum verði tryggt.

Sigmundur Davíð Gunnlaugsson segir nauðsynlegt fyrir flokkinn að stíga varlega til jarðar í þessum efnum. Hann segir að óæskilegt væri fyrir flokkinn að ætla sér of einharða afstöðu á þessu augnabliki enda séu önnur mál sem flokkurinn eigi að fást við núna. Hann á frekar von á því að einhvers konar millileið verði fyrir valinu til að sætta ólík sjónarmið.

Páll Magnússon styður hins vegar tillöguna og vill láta reyna á aðildarviðræður. Aðspurður hvort ekki komi upp óþægileg staða nái hann kjöri og tillagan um aðildarviðræður verði felld segir Páll svo ekki vera. Það sé hlutverk formanns að vera málsvari þeirra hugmynda sem flokksmenn hafi sameinast um.