Formaður líklegast kosinn í tveimur umferðum

Frekar er búist við að kjósa verði í tveimur umferðum um embætti formanns Framsóknarflokksins, en kosning hefst á flokksþingi hans klukkan tólf á hádegi.

Samkvæmt lögum flokksins verður frambjóðandi að hljóta yfir 50 prósent atkvæða til að ná kjöri. Í raun eru allir þingfulltrúar flokkksins í framboði en fimm hafa gefið kost á sér. Þrír þeirra eru taldir eiga raunhæfa möguleika á að ná kjöri; þeir Höskuldur Þór Þórhallsson alþingismaður, Páll Magnússon bæjarritari og Sigmundur Davíð Gunnlaugsson skipulagshagfræðingur.

Þá verður einnig kosið í embætti varaformanns og ritara. Siv Friðleifsdóttir þingflokksformaður og Birkir Jón Jónsson alþingismaður vilja bæði verða varaformenn. Í framboði til embættis ritara eru Sæunn Stefánsdóttir fyrrverandi alþingismaður, Gunnar Bragi Sveinsson frá Sauðárkróki og Eygló Harðardóttir alþingismaður.

Ef framkvæmd kosninga á þinginu gengur vel má búast við að úrslit verði ljós fyrir klukkan þrjú í dag.