Efnahagsbrotadeild verði færð frá RLS

Skynsamlegt er að sameina Efnahagsbrotadeild ríkislögreglustjóra og embætti fjögurra sérstakra saksóknara, að mati Rögnu Árnadóttur dómsmálaráðherra. „Efnahagsbrotadeildin yrði við það færð frá ríkislögreglustjóra þar sem embætti sérstaks saksóknara er sjálfstætt og ekki hægt að hafa það undir ríkislögreglustjóra." Gert er ráð fyrir því í lögum að ráðherra geti lagt til að sérstakur saksóknari verði sameinaður öðrum lögregluembættum.

„Ég held að það komi til umfjöllunar núna hvort það sé ekki einmitt hentugt að sameina þessi embætti, eða að minnsta kosti að þau starfi mjög nálægt hvort öðru, til þess að nýta þá sérþekkingu sem er fyrir hendi," segir Ragna en önnur hugmynd er uppi um að embættin starfi hlið við hlið í sama húsnæði.

Ólafur Þór Hauksson, sérstakur saksóknari, segir mörg rök hníga að því að þetta verði gert. „Ég held að það sé æskilegt að það séu lagðir saman kraftar á þessu sviði."

Skipa á þrjá sérstaka saksóknara við hlið þess sem nú er og setja á ríkissaksóknara yfir málaflokknum um bankahrunið, svipað og tíðkast þegar ríkissaksóknari lýsir sig vanhæfan í einstökum málum. Þetta kemur fram í nefndaráliti allsherjarnefndar síðan á fimmtudag. Tillaga dómsmálaráðherra var að setja sérstakan ríkissaksóknara yfir málaflokknum og stofna þar með nýtt embætti.

„Það var einfaldara að gera þetta svona en þetta er auðvitað bara útfærsluatriði," segir Steinunn Valdís Óskarsdóttir, formaður allsherjarnefndar. Hún segir að með þessu sé gengið að þeim tillögum sem Eva Joly lagði fram. Gerir hún ráð fyrir að mæla fyrir álitinu eftir helgi og þetta verði að lögum þá en allir nefndarmenn skrifuðu undir nefndarálitið.

„Því ber að fagna að fjölgað verður um þrjá saksóknara hjá embætti sérstaks saksóknara. Með því er verið að styrkja ákæruvaldið í landinu," segir Valtýr Sigurðsson ríkissaksóknari.

Ekki liggja enn fyrir áætlanir um fjárframlög til sérstaks saksóknara.

„Áætlanir frá sérstökum saksóknara og samkvæmt tillögum Evu Joly eru nálægt 500 milljónum á ári," segir Ragna sem telur að auka þurfi fjárveitinguna frá því sem nú er. Til samanburðar má geta þess að embætti ríkissaksóknara er með um 126 milljónir.vidirp@frettabladid.is

stigur@frettabladid.is