Bruðl í Alþjóðahúsinu

Alþjóðahús stendur ekki undir nafni og starfsemin þar er ekki svipur hjá sjón. Þetta er skoðun bæði núverandi og fyrrverandi starfsmanna sem gagnrýna að eigendum hafi verið greiddur arður og að stjórnarformaður þiggi milljónir króna í laun fyrir lögfræðistörf þrátt fyrir að vera í fullri vinnu annars staðar.

Þessi harða gagnrýni kemur fram í bréfi sem hópur núverandi og fyrrverandi starfsmanna hússins sendi borgarstjóra í síðasta mánuði.

Í bréfinu segir að eftir að sjálfseignarstofnunin Kosmos tók við rekstri Alþjóðahúss hafi farið að halla undan fæti. Stjórnendur Kosmos, þau Katla Þorsteinsdóttir og Hákon Gunnarsson, hafi haft annað markmið í huga með starfseminni en þjónustu við innflytjendur. Til að mynda hafi starfsfólki verið sagt að veita ekki fræðslu og fleira nema endurgjald kæmi fyrir.

Þá var einnig óskað eftir skýringum á arðgreiðslum af starfsemi Alþjóðahúss til Kosmos upp á fjórar milljónir árið 2008. Meira en tvær milljónir af þessari arðgreiðslu hafa þegar verið greiddar og rann helmingur hennar beint í vasa stjórnarmanna Kosmos.

Starfsmenn eru einnig ósáttir að þrátt fyrir að stjórnin hafi komið í veg fyrir að lögfræðingur yrði ráðin til starfa eins og nauðsyn var á hafi Katla stjórnarformaður þegið laun fyrir 50% vinnu í Alþjóðahúsi þrátt fyrir að hún sé í 100% starfi annars staðar, en hún er framkvæmdastjóri hjá Rauða Krossinum.

Samkvæmd heimildum fréttastofu hefur Katla þegið rúmar tvær milljónir í laun frá Alþjóðahúsi það sem af er þessu ári samhliða fullu starfi sínu sem framkvæmdastjóri hjá Rauða krossinum.

Katla sagði í samtali við fréttastofu í dag að vinna sín fyrir Alþjóðahús væri að mestu unnin um kvöld og helgar og að hún væri með þessu að spara húsinu kostnað. Varðandi arðgreiðslurnar segir hún að þær hafi að mestu farið í að greiða stjórnarlaun sem séu sanngjörn miðað við sambærilegar stofnannir.

Framtíð Alþjóðahúss ræðst á næstum dögum en nefnd á vegum Reykjavíkurborgar hefur lagt til að þjónustusamningur við húsið verði ekki endurnýjaður.