Gunnar Björn næsti leikstjóri Skaupsins

„Það er ekkert frágengið okkar á milli. Við erum að ræða samningsatriði og skoða ýmsa fleti. En mér finnst hann spennandi og áhugaverður kostur,“ segir Þórhallur Gunnarsson, dagskrárstjóri Ríkissjónvarpsins.

Þórhallur hefur átt í viðræðum við Gunnar Björn Guðmundsson leikstjóra um að taka að sér hið mikla verkefni sem er að stýra sjálfu Áramótaskaupinu. Enginn ætti að velkjast í vafa um að því starfi fylgir gríðarleg pressa.

„Já, það er mikil áskorun. Níutíu og fimm prósent þjóðarinnar að horfa á verk eftir mann! En gaman að fá ungt og ferskt blóð í þetta. Gunnar hefur allt með sér. Ferskur andblær. Hann er bráðefnilegur leikstjóri og hefur sýnt góð vinnubrögð í öllu sem hann hefur gert. Til dæmis Astrópíu,“ segir Þórhallur.

Síðast leikstýrði Silja Hauksdóttir Skaupinu, þar áður Ragnar Bragason og þá Reynir Lyng-dal. Þórhallur lýsir yfir ánægju með vinnubrögð þeirra hvers um sig.

„En mér finnst Skaupið vera þess eðlis að sem flestir eigi að fá að spreyta sig á því.“

„Það eru allavega viðræður í gangi. Þetta er mjög spennandi. Eitt af mest spennandi verkefnum sem í boði eru, krefjandi og mikil pressa, en ég er til ef af verður,“ segir Gunnar Björn. En vill lítið tjá sig um málið á þessu stigi. Vill ekki einu sinni upplýsa hvort áhorfendur megi búast við Hafnarfjarðarbröndurum í næsta Skaupi en Gunnar er Hafnfirðingur.

Þaðan er dobía af góðum grínleikurum: Laddi, Siggi Sigurjóns, Magnús „bolla“ Ólafsson, Steinn Ármann, Stefán Karl og Björk Jakobs… Aðspurður hvort þessi megi ekki örugglega búast við hlutverkum í Skaupinu segir Gunnar hlæjandi: „No comment“. - jbg