Hafnar ásökunum um sögufölsun

Þingmaður Sjálfstæðisflokksins, Tryggvi Þór Herbertsson, skrifar á bloggið sitt að Magnús Orri Schram, þingmaður Samfylkingarinnar, sé beinlínis að reyna að falsa söguna vegna eftiráskýringar varðandi fyrirvara við Icesave.

Ástæða þessarar harkalegu ummæla Tryggva Þórs er viðtal við þingmennina tvo sem var tekið í Íslandi í Bítið í morgun. Þar sátu þeir og skeggræddu meðal annars Icesave frumvarpið. Þar sagði Magnús Orri að það hefði alltaf staðið til innan Samfylkingarinnar að setja fyrirvara á Icesave-samninginn.

Þessu neitar Tryggvi Þór algjörlega og skrifar á bloggið sitt: „Ég var í útvarpsþætti á Bylgjunni með samfylkingarþingmanni í morgun. Þar var m.a. rætt um IceSave-ósómann og óhætt er að segja að mér hafi verið stórlega misboðið. Þingmaðurinn hélt því þar fram að alltaf hefði staðið til að setja fyrirvara við ríkisábyrgðina þegar málið kæmi til þingsins. Þvílík ósannindi!"

Magnús Orri ver orð sín og segir að strax í upphafi hafi verið fjölmargir innan þingflokks Samfylkingarinnar sem vildu herða á nokkrum atriðum varðandi Icesave.

„Það kom strax upp sá vilji innan þingflokksins og þá var helst litið til efnahagslegu þáttanna. Þeim vilja var beint inn til nefndarinnar sem síðar sá um málið," segir Magnús Orri og á þá við að sterkum vilja Samfylkingarmanna um fyrirvara við Icesave-samninginn hafi verið beint til samflokksmanna innan fjárlaganefndar.

„Ég hafna því alfarið að þarna hafi verið um sögufölsun að ræða," segir Magnús Orri og bendir á að hann hafi betri vitneskju um það sem gerist innan þingflokks Samfylkingarinnar heldur en Tryggvi Þór.