Erlent

Makedónía tilbúin í viðræður

Stækkunarstjóri Evrópusambandsins kynnti stöðu aðildarviðræðna við Tyrkland og Balkanskagaríkin. fréttablaðið/AP
Stækkunarstjóri Evrópusambandsins kynnti stöðu aðildarviðræðna við Tyrkland og Balkanskagaríkin. fréttablaðið/AP
Olli Rehn, stækkunarstjóri Evrópusambandsins, segir að Makedónía uppfylli nú öll skilyrði sem þarf til þess að aðildarviðræður geti hafist.

Makedónía sótti um aðild árið 2004 en aðildarviðræður hafa ekki getað hafist vegna deilna við Grikkland, sem vill að Makedónía breyti um nafn. Rehn vonast til þess að frekari viðræður um lausn á þeirri deilu skili brátt árangri.

Aðildarviðræður við Króatíu eru hins vegar langt komnar, en Króatía þarf engu að síður að hraða ýmsum umbótum eigi viðræðum að geta lokið um mitt næsta ár, eins og að er stefnt.

Önnur ríki á Balkanskaga, sem óska eftir aðild, þurfa að bíða lengur og vinna að umbótum í stjórnsýslu og mannréttindamálum.

Tyrkland þarf sömuleiðis að hraða endurbótum, einkum á sviði mannréttinda, til að eiga möguleika á aðild. Aðildarviðræður Tyrklands og Evrópusambandsins hófust árið 2005, en hefur lítið miðað áleiðis.

Egemin Bagis, aðalsamningafulltrúi Tyrklands gagnvart ESB, segist fagna skýrslunni, sem hann segir fjalla bæði um þann árangur sem náðst hefur og það sem enn er óunnið. Bagis sakar stjórnarandstöðuna í Tyrklandi um að tefja fyrir sumum helstu umbótamálunum.- gb



Fleiri fréttir

Sjá meira


×