Ríkisstjórn veldur UVG gífurlegum vonbrigðum

Stjórn Ungra vinstri grænna krefst þess að ríkisstjórn Vinstrihreyfingarinnar - græns framboðs og Samfylkingar taki upp mannúðlega stefnu í málefnum flóttamanna og hætti nú þegar að beita fyrir sig Dyflinarsáttmálanum í stað þess að taka fyrir mál þeirra flóttamanna sem hingað leita skjóls. Þetta kemur fram í tilkynningu frá stjórn UVG.

„Í ljósi atburða dagsins sér stjórn Ungra vinstri grænna sig knúna til að ítreka þessa kröfu sína, en í dag var flóttamanni frá Íran vísað úr landi, án þess að kæra hans á þeirri ákvörðun hefði verið tekin fyrir," segir í tilkynningunni.

Ríkisstjórnin veldur Ung vinstri grænum miklum vonbrigðum. „Framganga ríkisstjórnarinnar í málefnum flóttamanna hefur valdið stjórn Ungra vinstri grænna gífurlegum vonbrigðum og telja Ung vinstri græn hið svokallaða dóms- og mannréttindamálaráðuneyti ekki hafa hafið feril sinn sem slíkt á trúverðugan hátt."