Leikaralið Balta steinlá á Jónsmessumóti

Baltasar Kormákur smalaði saman hópi valinkunnra leikara til að taka þátt í Jónsmessumóti í knattspyrnu sem haldið er á Hofsósi ár hvert. Skemmst er að segja frá því að leikararnir steinlágu þrátt fyrir að vera með fyrrum atvinnu- og landsliðsmann í knattspyrnu innanborðs.

„Við skitum hressilega á okkur," segir Baltasar Kormákur Baltasarsson, leikari og knattspyrnumaður með meiru. Baltasar fékk kollega sína úr leikarastéttinni til þess að koma norður á Hofsós og taka þátt í árlegu Jónsmessumóti í knattspyrnu þar í bæ. Baltasar hafði góða reynslu af mótinu en hann sigraði mótið árið 2007 ásamt gömlum kempum úr liði Neista. Hið sama var ekki uppi á teningnum núna. „Við komumst ekki einu sinni upp úr riðlinum," segir Baltasar.

Liðið var þó ekki skipað neinum aukvisum. Meðal leikmanna voru menn á borð við Rúnar Frey Gíslason, Kjartan Guðjónsson, Björn Inga Hilmarsson, Björn Thors, Vigni Rafn Valþórsson og Pétur Marteinsson, fyrrum landsliðs- og atvinnumaður í knattspyrnu en hann var „pikkaður upp" á Búðardal á leiðinni norður.

„Balti hafði allt aðra og stærri drauma fyrir mótið. Hann fór strax að tala um úrslitaleikinn. Fór að velta fyrir sér hvort hann yrði ekki örugglega spilaður á stærri velli og annað," segir Kjartan Guðjónsson leikari sem lék í stöðu hægri bakvarðar á mótinu. „Svo klúðraðist allt og menn voru farnir að öskra hver á annan."

Staða hægri bakvarðar var þó ekki eina ábyrgðarstaðan sem Kjartan gegndi í þessari keppnisferð. Hann sá einnig um að ferja liðið í rútu norður en hann mun hafa verið sá eini með nógu gamalt ökuskírteini til að mega keyra rútu. „Já þetta voru einhverjar reglur sem breyttust '88 þannig að ég má keyra rútu," segir Kjartan.

Hann kunni vel við hlutverk rútubílstjóra og lifði sig heldur betur inn í það. „Já já. Ég var skoðandi stóru rúturnar í Staðarskála. Gekk í kringum þær og sparkaði létt í dekkin. Svo bibaði ég á rúturnar sem við mættum þannig að ég var alveg kominn inn í þetta samfélag rútubílstjóra," segir Kjartan sem er sannfærður um að hann á eftir að keyra rútu aftur. „Já blessaður vertu. Ég er alltaf að skoða rútur á netinu. En næst þegar ég kem í Staðarskála vil ég frítt kaffi og jafnvel mat, ég er að koma með hellings viðskipti á staðinn," segir Kjartan léttur á því sem endranær.

Þrátt fyrir skelfilega útreið leikaraliðsins í mótinu voru menn engu að síður í skýjunum með ferðina. „Já þetta var rosalega gaman. Frábært veður og mjög skemmtilegt."