Skoða stofnun orkusamlaga

Til skoðunar er í iðnaðarráðuneytinu að stofna sérstök félög um orkuframkvæmdir og fá lífeyrissjóði og erlenda fjárfesta að borðinu. Iðnaðarráðherra segir að mjög mikilvægt sé að hefja framkvæmdir til að geta selt orku, vöntun sé á henni í dag.

Þá eru hugmyndir uppi um að orkusamlögin gætu stofnað sér félög um einstakar framkvæmdir og þær yrðu þá utan við efnahagsreikninga orkufyrirtækjanna. Þau félög sæju bæði um orkuvinnsluna og framkvæmdina af hálfu kaupandans, sem yrði hluti hvers félags fyrir sig.

Óljóst er hvort um eitt orkusamlag yrði að ræða fyrir allt landið, eða tvö; eitt á Norðausturlandi og annað á Suðvesturlandi.

Katrín Júlíusdóttir iðnaðarráðherra segir stjórnvöld vinna að því að laða fyrirtæki í grænum iðnaði til landsins. Til þess að það gangi upp þurfi að geta afhent næga orku, á því sé skortur nú. Fjármagn vanti til að fara í virkjanir sem eru á teikniborðinu nú þegar, svo sem Búðarhálsvirkjun og jarðvarmavirkjanir á Hellisheiði og víðar.

Þá er unnið að rammalöggjöf um ívilnanir til handa nýjum fjárfestum. Katrín segir það gríðarlega mikilvægt að allar reglur liggi skýrar fyrir hvað þessi mál varðar, í stað þess að semja sérstaklega við einstök fyrirtæki.- kóp