Framferði Ísraela á Gaza mótmælt í Háskólabíó

Fjölmörg félagasamtök, stjórnmálahreyfingar og fjöldasamtök gangast fyrir mótmælafundi í Háskólabíói á sunnudaginn klukkan 15:00 undir kjörorðinu: Þjóðarsamstaða gegn fjöldamorðunum á Gaza.

Þetta kemur fram í tilkynningu frá félaginu Ísland-Palestína. Þar segir ennfremur að Arnar Jónsson leikari verði fundarstjóri á fundinum.

Þeir sem munu flytja ræður verða Guðfríður Lilja Grétarsdóttir stjórnmálafræðingur, Jóhanna K. Eyjólfsdóttir framkvæmdastjóri Íslandsdeildar Amnesty International og Kristín Helga Gunnarsdóttir rithöfundur. Fjölbreytt tónlistardagskrá verður á fundinum : Trio Nordica, Barnakór Kársnes, Hulda Björg Garðarsdóttir, Steinunn Birna Ragnarsdóttir og fleira.

Eftirtaldir hafa nú þegar staðfest aðild að fundinum:

ASÍ, BSRB, Félagið Ísland-Palestína, Frjálslyndi flokkurinn, KÍ, Landssamband sjálfstæðiskvenna, SFR, Samiðn, Samfylkingin, Starfsgreinasambandið og VG.

Boð um aðild að fundinum hefur verið sent fjölda félagasamtaka og búist er við að fleiri eigi eftir að tilkynna þátttöku, enda öll félagasamtök, stjórnmálahreyfingar og fjöldasamtök hvött til að vera með.