Fólksfækkunin vítahringur í Skaftárhreppi

Börnum í sveitinni milli sanda hefur á þremur áratugum fækkað um tvo þriðju. Þegar mest var, árið 1981, voru 115 nemendur í skólanum á Kirkjubæjarklaustri. Á næsta ári segir skólastjórinn, Kjartan Kjartansson, að þeir verði 37.

Oddviti Skaftárhrepps, Jóna Sigurbjartsdóttir, telur að kreppan fyrir sunnan snúi þessu við. Höfuðborgarsvæðið hafi alltaf lokkað, fólk hafi séð þar gull, en nú finnist sér að þetta sé að snúast við.

Það hefur þó ekki gerst ennþá. Ungar barnafjölskyldur eru enn að flytja. Ástæðan sem gefin er upp er sú að það vanti atvinnutækifæri.

Þetta er vítahringur því fólksfækkunin stuðlar að enn meiri fólksfækkun. Bjarni Daníelsson sveitarstjóri segir mikilvægast að fá fjölbreyttari störf á svæðið. Þegar íbúum fækki á örfáum áratugum úr 700 niður í 450 þá flytjist atvinnufjölbreytni um leið í burtu.

Unga fólkið sem áfram vill búa í sveitinni sér litla endurnýjun. Ferðaþjónustan sé vaxandi en hún skapi fyrst og fremst sumarstörf. Einhver reitingur ferðamanna að vetri haldi fólki ekki á staðnum.

Sveitarstjórinn telur ekki ástæðu til að örvænta. Þótt línan hafi verið niðurávið segir hann töluverða bjartsýni á svæðinu og fólk sjái ýmis tækifæri í stöðunni. Nánar verður fjallað þau síðar í fréttaröð Stöðvar 2.