Íbúi í Grindavík: Hélt að um Suðurlandsskjálfta væri að ræða

Sigmar Eðvarðsson, bæjarfulltrúi í Grindavík, segir jarðskjálftann sem varð klukkan rúmlega hálftíu í kvöld hafa staðið í 4 til 5 sekúndur. Ár er liðið frá Suðurlandsskjálftanum og segir Sigmar að hann hafi í fyrstu talið að um annan slíkan skjálfta hafi verið ræða. Hann hafi ekki áttað sig ekki á því að upptök skjálftans væru í grennd við bæinn.

Veðurstofa Íslands segir að jarðskjálftinn hafi átt upptök sín um 8 kílómetra norðaustur af Grindavík klukkan 21:33. Hann var 4,7 stig á richter.

„Þetta var öflugur skjálfti og það dúaði vel hjá okkur en það var ekki þannig að það færi eitthvað af veggjunum," segir bæjarfulltrúinn sem var að horfa á sjónvarpið ásamt Lindu Oddsdóttur, eiginkonu sinni, þegar skjálftinn reið yfir. „Þetta var ekki högg eins og oft áður heldur vaxandi hreyfing."

Sigmar hafði ekki heyrt af skemmdum á eignum í bæjarfélaginu. „Við erum svo sem ekki óvön svona jarðskjálftum."