Sameing háskólanna rædd

Menntamálaráðherra fundar í dag með stjórnendum háskólanna um sameiningu ákveðinnar starfsemi skólanna. Er þar sérstaklega horft til stoðþjónustunnar, að innritun verði sameiginleg.

Katrín Jakobsdóttir menntamálaráðherra segir að unnið verði að málinu í vetur og hún vonist til að sjá raunhæfar tillögur um framtíðarskipan háskólamála í vor.

Nokkrar viðræður hafa átt sér stað á milli ýmissa skóla um mögulega sameiningu. Er þar helst að telja viðræður á milli Háskólans á Bifröst, Listaháskóla Íslands og Háskólans í Reykjavík. Upp úr þeim viðræðum slitnaði, ekki síst þar sem stjórnendur Listaháskólans töldu starfsemi skólans þess eðlis að eðlilegt væri að um hana væri sér stofnun. Fréttablaðið hefur heimildir fyrir því að ýmsir aðrir sameiningarkostir hafi verið ræddir og stjórnendur hinna ólíkustu skóla hafi rætt saman og viðrað mögulegt samstarf eða sameiningu.

Menntamálaráðherra segist sjá ýmsa kosti í þessum efnum og vill að aðilar ræði málin með opnum huga. „Við gefum okkur veturinn til að vinna úr tillögunum og auðvitað væri gaman ef hægt væri að ljúka málinu áður en næst verður innritað í skólana. Við sjáum vonandi fyrstu skrefin strax í haust.“- kóp