Rússar vilja ekki að Íran eignist kjarnorkuvopn

Hillary Clinton hefur verið á ferðalagi um Evrópu undanfarna daga. Hún skaust til Moskvu til þess að kanna afstöðu ráðamanna þar til hertra refsiaðgerða gegn Íran ef Íranar gera ekki hreint fyrir sínum dyrum í kjarnorkumálum.

Eftir að hafa rætt við Sergei Lavrov utanríkisráðherra Rússlands héldu þau sameiginlegan blaðamannafund.

Lavrov ítrekaði þar að Rússar hefðu litla trú á því að hertar refsiaðgerðir skiluðu árangri. Hann sagði einnig að mikilvægt væri að Íranar fengju að njóta þeirra kosta sem kjarnorka í friðsamlegum tilgangi gæti fært þeim.

Um hugsanlega smíði Írana á kjarnorkuvopnum voru utanríkisráðherrarnir þó sammála.

Lavrov sagði að ekki mætti brjóta sáttmálann bann við dreifingu kjarnorkuvopna.

Í heimsókn sinni mun Clinton einnig ræða við rússnesku leiðtogana um Afganistan, Norður-Kóreu, stækkun NATO, mannréttindi og vígbúnað.