Ferguson sér eftir því að hafa sleppt enska bikarnum árið 2000

Alex Ferguson, stjóri Manchester United, hefur viðurkennt að hann sjái eftir því að hafa dregið lið sitt út úr ensku bikarkeppninni fyrir tíu árum síðan. Manchester United var ekki með í ensku bikarkeppninni 1999-2000 þar sem félagið valdi frekar að taka þá í Heimsmeistarakeppni félagsliða sem fram fór í Brasilíu.

„Ég sá eftir þessu af því að við fengum ekkert nema leiðindi og gagnrýni vegna þessa máls þrátt fyrir að þetta hafi ekki verið okkur að kenna," sagði Alex Ferguson sem segir aðalástæðuna fyrir ákvörðuninni hafi verið sú að United var í pólitískum leik að reyna hjálpa Englendingum að fá að halda HM.

FIFA pressaði á að Evrópumeistararnir yrðu með í keppninni og Englendingar hefðu fengið mörg mínusstig í kladdann fyrir að sleppa keppninni í Brasilíu.

Manchester United vann enska meistaratitilinn af miklu öryggi þetta tímabil en félagið hefur alls orðið fimm sinnum bikarmeistari undir stjórn Ferguson.

„Þrátt fyrir þessa ósanngjörnu gagnrýni þá reyndist þetta vera gott tveggja vikna frí fyrir liðið," rifjar Ferguson upp en Untied stakk Arsenal og Leeds af á lokasprettinum og endaði tímabilið með 18 stiga forskot.