Þú og ég á Arnarhóli í kvöld

„Það eru komin að minnsta kosti tíu ár síðan dúettinn kom síðast saman á 17. júní ef ekki lengra síðan," svarar Helga Möller sem mun ásamt Jóhanni Helgasyni syngja þekkta slagara diskódúettsins „Þú og ég" á Arnarhóli klukkan 21:20 í kvöld.

„Við eigum þrjátíu ára starfsafmæli á þessu ári og höfum því verið að koma fram á nokkrum stöðum og það er ótrúlegt hvað margir, ungir sem aldnir, þekkja lögin okkar og syngja með."

„Vonandi verður þannig stemning á Arnarhóli í kvöld," segir Helga.

„Við erum líka í hljóðveri að gera ný lög sem lofa góðu og hugsum okkur að vera á ferðinni í vetur með hljómsveit með okkur. Meðal annars munum við troða upp á Nasa og á Græna Hattinum á Akureyri."