Vill að skipuð verði neyðarstjórn

„Hættum að berja höfðinu við steininn. Fjölmörgum þjóðum sem komnar hafa verið í þessa stöðu, hafa verið skipaðar neyðarstjórnir. Að vísu „þriðja heims ríkjum“, en það er það sem við erum orðin,“ segir fyrrum borgarfulltrúinn Helgi Pétursson í grein á heimasíðu Samfylkingarinnar. Helgi situr í framkvæmdastjórn flokksins og hann er jafnframt formaður Samfylkingarfélagins í Garðabæ.

Fyrr í vikunni gagnrýndu Sigrún Elsa Smáradóttir og Oddný Sturludóttir ríkisstjórnina og fulltrúa Samfylkingarinnar á Alþingi. Báðar sitja þær í borgarstjórn fyrir Samfylkinguna. Ljóst er að óánægja innan flokksins með stöðu mála fer vaxandi.

Helgi segir að til sé þekking á því hvernig slíkar neyðarstjórnir eru settar á laggirnar og hverjir skipa þær. „Að auki verðum við að sætta okkur við tillögur og ráðgjöf færustu erlendra sérfræðinga sem völ er á.“ Það er borin von að innlendir aðilar geti rannsakað það sem úr lagi fór, að mati Helga.

„Þiggjum aðstoð í formi neyðarstjórnar sem vinnur með færustu erlendum sérfræðingum að tillögum um nýtt og betra samfélag, ráðstöfunum sem fela í sér þær endurbætur að ástand undanfarinna ára komi aldrei aftur. Svo göngum við til kosninga.“

Pistil Helga Péturssonar er hægt að nálgast hér.