Bæir rýmdir - enn hætta á Vestfjörðum

Ekki hefur dregið úr vindi og ofankomu á norðanverðum Vestfjörðum og hefur nú verið ákveðið að rýma sveitabæi á svæðinu. ,,Ég hélt að aðgerðum okkar væri lokið en nú eru að bætast við þessir sveitabæir," segir Kristín Völundardóttir lögreglustjóri en embætti hennar hefur fengið beiðni frá Veðurstofunni um rýmingu á eftirfarandi bæjum:

Fremstu-húsum í Dýrafirði, Geirastaði í Syðridal, Höfða og Kirkjubæ í Skutulsfirði, Tankinn innan Flateyrar og Hraun í Hnífsdal. Þá er verið að athuga með viðveru í Fremri- og Neðri-Breiðadal og að Kirkjubóli í Korpudal í Önundarfirði.

Kristín hefur í samráði við Halldór Halldórsson bæjarstjóra Ísfjarðarbæjar hafið rýmingu. ,,Ástæða rýmingar er vegna þeirrar ofankomu sem átti að linna nú upp úr hádegi en ekki hefur gengið eftir. Rýming er hugsuð sem forvörn og til að tryggja öryggi íbúa viðkomandi bæja."

,,Við vonum að þessu fari að linna," segir Kristín og bætir við að svo stöddu sé lítið hægt að segja til um hvenær fólk geti farið inn á þau svæði sem hafa verið rýmd undanfarin sólarhring.

Vegagerðin hefur ákveðið að takmarka umferð um Skutulsfjarðarbraut á Ísafirði vegna hættu á snjóflóðum úr giljunum fyrir ofan Grænagarð. Björgunarsveitin á Ísafirði mun stýra umferðinni á Skutulsfjarðarbraut á vegakaflanum frá Brúarnesti að gatnamótum Seljalandsvegar. Fólk er kvatt til að vera ekki á ferðinni að óþörfu.

Þá hefur Vegagerðin lokað veginum um Hvilftarströnd frá þjóðvegi 60 (Vestfjarðarvegi) út á Flateyri.