ÖSE boðið að hafa eftirlit með kosningum hér

Fastanefnd Íslands hjá Öryggis- og samvinnustofun Evrópu, ÖSE, í Vín, bauð stofnuninni í dag að hafa eftirlit með kosningunum sem áætlaðar eru hér á landi í vor.

Í fréttatilkynningu frá utanríkisráðuneytinu segir að öll þátttökuríki ÖSE séu skuldbundin til að bjóða stofnuninni að hafa eftirlit með þing- og forsetakosningum. Ekki liggi fyrir hvort ÖSE mun þekkjast boðið, en íslensk stjórnvöld muni staðfesta kjördag, sem nú er áætlaður 25. apríl, um leið og formlega hafi verið boðað til kosninga.