Tillaga um afbrigði í Icesave málinu felld

Tillaga ríkisstjórnarinnar um að frumvarp um Icesave samningana yrði lagt fram á Alþingi með afbrigðum var felld við upphaf þingfundar í dag. Alls greiddu 29 atkvæði gegn tillögunni en 23 greiddu tillögunni atkvæði sitt.

Frumvarpinu var dreift á Alþingi í gær og til stóð að ræða það á þingfundi í dag eftir að umræður um stöðu Landsvirkjunar færu fram. Samkvæmt þingsköpum þarf að leita afbrigða ef taka á mál til umræðu með svo skömmum fyrirvara.

Þegar greidd voru atkvæði um tillöguna stigu Illugi Gunnarsson, þingmaður Sjálfstæðisflokksins, og Gunnar Bragi Sveinsson, þingmaður Framsóknarflokksins, í pontu og mótmæltu tillögunni.