Svifryk þrjá daga í röð yfir mörkum

Styrkur svifryks fór yfir heilsuverndarmörk þrjá daga í röð í liðinni viku. Rykbinding á helstu umferðagötum á föstudag dugði ekki allan daginn vegna þess að blandan var of þunn. Fram kemur í tilkynningu að ekki er búist við svifryksmengun næstu daga.

Styrkur svifryks hefur nú farið fimm sinnum yfir heilsuverndarmörk á þessu ári en má fara 12 sinnum yfir heilsuverndarmörk. Svifryk fór tíu sinnum yfir heilsuverndarmörk í marsmánuði 2006.

Haft er eftir Guðbjarti Sigfússyni, deildarstjóra gatna hjá umhverfissviði, að sterkari saltblöndu til rykbindingar hafi verið úðað á helstu umferðagötur á sunnudagsnótt. Hann býst við að hún dugi í þrjá daga.