Hár Presley ekki ókeypis

Hárlokkar af Elvis Presley seldust fyrir 18.300 dollara á uppboði í Chicago í gær.

Fréttastofan greindi frá því í síðustu viku að til stæði að bjóða upp nokkrar hárlufsur sem klipptar voru af höfði rokkkonungsins Elvis Presley þegar hann hóf herþjónustu árið 1958. Uppboðið átti sér stað í gær og er skemmst frá því að segja að lokkarnir seldust á 18.300 dollara, jafnvirði tæplega 2,3 milljóna íslenskra króna.

En hárið var ekki það eina sem harðir Presley-aðdáendur áttu kost á að bjóða í heldur bauð Leslie Hindman-uppboðshúsið einnig upp á bómullarskyrtu með ísaumuðu fangamarkinu EP, upphafsstöfum nafns rokkarans. Hún fór á eina 62.800 dollara sem jafngildir tæplega 7,8 milljónum króna. Forsvarsmenn Leslie Hindman mega vera sáttir við sinn hlut, af þeim 200 hlutum úr fórum Presley sem boðnir voru upp seldust langflestir hærra verði en spáð hafði verið.

Vonandi fékk sá kaupandi sem hreppti hárið ekki falsaða vöru í hendur því engar DNA-prófanir voru gerðar á lokkunum. John Reznikoff hjá Leslie Hindman fullyrti hins vegar við fjölmiðla að sérfræðingur í hári frægra persóna, eða celebrity hair authentication eins og það heitir á engilsaxneskunni, hafi kveðið upp þann úrskurð að hárið samræmist því hári af Elvis sem sá eigi í sýnasafni sínu. Þá þarf víst enginn að kvíða neinu.