Morðvopnið notað til að steikja hamborgara

Hótel Bjarkalundur í Reykhólasveit er orðinn sögustaður eftir þættina um Georg Bjarnfreðarson og félaga og sækist fólk nú í að skoða vettvang og leikmuni helstu atburða Dagvaktarinnar. Morðvopnið, pannan sem Gugga fékk í hausinn, er ennþá notað til að steikja hamborgara.

Bjarkalundur er ekki bara elsta sveitahótel á Íslandi, nú er það orðið frægasta sveitahótelið eftir að sjónvarpsþáttaröðin um Dagvaktina sló í gegn á Stöð 2 í haust. Hótelstjórinn segir að viðskiptin hafi aukist vegna þáttanna og margir láti taka ljósmynd af sér á þeim stöðum þar sem helstu atriðin voru tekin upp.

Þarna er allt eins og það var í sjónvarpsþáttunum. Þarna er matsalurinn og barinn, en svo virðist sem eldhúsið hafi mesta aðdráttaraflið enda gerðist þar örlagaríkasti atburðurinn þegar Gugga var slegin í hausinn með pönnu.

Og nú þarf að auka við gistirýmið. Búið er stækka tjaldstæðið og bæta við litlum sumarhúsum. Hótelstjórinn var þó ekki alveg sáttur við hvernig þáttaröðin endaði.